સેવાની શરતો

આ શરતો તમારી અને ZeniaPex Private Limited ("અમે") વચ્ચેનો કરાર છે. ZeniaPex સમાજમિલન એપ અને આ વેબસાઇટ ચલાવે છે. "તમે" એટલે એપ વાપરનાર ખાતાધારક, અને જો જુદી હોય તો, જેના માટે પ્રોફાઇલ બને છે તે વ્યક્તિ પણ.

શરતો સ્વીકાર્યા વગર પ્રોફાઇલ મોકલી શકાતી નથી, અને તમે કઈ આવૃત્તિ ક્યારે સ્વીકારી તેની નોંધ રહે છે. શરતો મંજૂર ન હોય, તો કૃપા કરીને સમાજમિલન ન વાપરો.

ગોપનીયતા નીતિ અને સમુદાય માર્ગદર્શિકા પણ આ શરતોનો ભાગ છે.

• ગોપનીયતા નીતિ
• સમુદાય માર્ગદર્શિકા

સમાજમિલન પરિવારો માટેનું સાધન છે: પ્રોફાઇલ બનાવવા, પોતાના સમાજમાં યોગ્ય પાત્ર શોધવા, અને બન્ને પરિવાર ઇચ્છે તો વાત આગળ વધારવા. મુલાકાત, સગપણ, સગાઈ અને લગ્નના બધા નિર્ણય સભ્યો અને તેમના પરિવારના પોતાના છે.

સમાજમિલન ફક્ત લગ્નના હેતુ માટે છે. આ ડેટિંગ સાઇટ નથી. અમે લગ્ન ગોઠવતા નથી, કોઈ પરિવાર વતી વાત કરતા નથી, અને કોઈ સંબંધ, સગાઈ કે લગ્નમાં પક્ષકાર નથી.

દરેક સમાજનું કાર્યાલય પોતાના સભ્યોની પ્રોફાઇલ મંજૂર કરે છે અને દસ્તાવેજ તપાસે છે. એ કામ સમાજનું પોતાનું છે; અમે તે માટેનું સાધન આપીએ છીએ.

અમે સેવામાં સુધારા કરતા રહીએ છીએ, એટલે કોઈ સુવિધા બદલાઈ શકે કે બંધ પણ થઈ શકે.

• જેના માટે પ્રોફાઇલ બને છે તેની ઉંમર ઓછામાં ઓછી ૧૮ વર્ષ હોવી જોઈએ. એપ ૧૮ વર્ષથી ઓછી ઉંમરની પ્રોફાઇલ સ્વીકારતી નથી.
• એપ વાપરનાર ખાતાધારકની ઉંમર પણ ૧૮ વર્ષ કે વધુ હોવી જોઈએ.
• ભારતના બાળ લગ્ન પ્રતિબંધ અધિનિયમ, ૨૦૦૬ મુજબ, લગ્ન સમયે વરની ઉંમર ઓછામાં ઓછી ૨૧ વર્ષ અને કન્યાની ઓછામાં ઓછી ૧૮ વર્ષ હોવી જોઈએ. ૧૮ વર્ષના યુવકની પ્રોફાઇલ બની શકે, પણ લગ્ન ૨૧ વર્ષ પૂરાં થયા પછી જ.
• લગ્ન સમયે વ્યક્તિ કાયદેસર રીતે લગ્ન કરી શકે તેવી હોવી જોઈએ: અપરિણીત, છૂટાછેડા થયેલા, વિધુર કે વિધવા, કે જેમનું લગ્ન રદ જાહેર થયું હોય. અલગ રહેતા હો પણ છૂટાછેડા ન થયા હોય, તો નવા લગ્ન પહેલાં કાનૂની પ્રક્રિયા પૂરી કરવી જરૂરી છે.
• તમે જે સમાજમાં જોડાઓ, તેના સભ્ય હોવા જોઈએ, કે તે સમાજના નિયમો મુજબ જોડાવાને પાત્ર હોવા જોઈએ.
• નિયમ ભંગ બદલ જેનું ખાતું બંધ કરાયું હોય, તે અમારી મંજૂરી વગર ફરી જોડાઈ શકે નહીં.

ઘણી વાર પ્રોફાઇલ માતા-પિતા કે વાલી બનાવે છે અને ચલાવે છે. પ્રોફાઇલ બનાવતી વખતે એપમાં નોંધાય છે કે તે કોણ ચલાવે છે: વ્યક્તિ પોતે, માતા-પિતા, વાલી, કે સાથે મળીને.

• જેના માટે પ્રોફાઇલ બનાવો છો, તેમને પહેલાં જણાવો અને તેમની સંમતિ લો. તેમની મરજી વિરુદ્ધ પ્રોફાઇલ ન બનાવો.
• પ્રોફાઇલમાં લખેલી દરેક વિગત, અને તેમાંથી મોકલેલા દરેક રસ અને ચેટ માટે, ખાતું ચલાવનાર જવાબદાર છે.
• જેના માટે પ્રોફાઇલ છે તે વ્યક્તિ ઇચ્છે, તો પ્રોફાઇલ બંધ કરાવી શકે. તે માટે સમાજ કાર્યાલય કે ફરિયાદ અધિકારીનો સંપર્ક કરે.
• મિત્ર કે દૂરના સગા જેવા બીજા કોઈ માટે, તેમની જાણ બહાર પ્રોફાઇલ ન બનાવો.

• નામ, જન્મ તારીખ, લગ્નની સ્થિતિ, ભણતર, કામ, આવક, કુટુંબ અને સમાજ-પરગણાની વિગત સાચી આપો.
• ફોટા તાજેતરના અને એ જ વ્યક્તિના હોય. બીજાનો ફોટો ક્યારેય નહીં.
• એક વ્યક્તિની એક જ પ્રોફાઇલ. સરખી અટક અને જન્મ તારીખવાળી બે પ્રોફાઇલ સમાજ કાર્યાલયને આપોઆપ બતાવાય છે.
• નવી નોકરી કે નવું શહેર જેવી વિગત બદલાય, તો એપમાં સુધારો, કે સમાજ કાર્યાલયને જણાવો.
• લગ્ન નક્કી થાય એટલે એપમાં "લગ્ન થઈ ગયા" દબાવી પ્રોફાઇલ બંધ કરો, જેથી બીજા પરિવારો રાહ ન જુએ.
• ખોટી માહિતી કે ખોટા દસ્તાવેજ મળે, તો પ્રોફાઇલ નામંજૂર, સસ્પેન્ડ કે દૂર થઈ શકે. ખોટા દસ્તાવેજ આપવા એ કાયદા મુજબ ગુનો પણ બની શકે.

• પ્રોફાઇલ મોકલ્યા પછી તે મંજૂરીની રાહમાં રહે છે: ત્યાં સુધી કોઈને દેખાતી નથી, અને તમે રસ મોકલી શકતા નથી.
• સમાજ કાર્યાલય મંજૂર કરે, એટલે પ્રોફાઇલ તમારા સમાજના સભ્યોને દેખાય છે.
• કંઈ સુધારવાનું હોય, તો કાર્યાલય કારણ સાથે પ્રોફાઇલ પાછી મોકલે છે. તમે સુધારીને ફરી મોકલી શકો.
• કાર્યાલય પ્રોફાઇલ નામંજૂર કરે, તો કારણ લખવું ફરજિયાત છે, અને તમને એપમાં સૂચના મળે છે.
• મંજૂરી ક્યારે મળશે તેનો કોઈ નક્કી સમય નથી; તે સમાજ કાર્યાલય પર આધાર રાખે છે.
• કોઈને સભ્ય તરીકે સ્વીકારવા કે નહીં, તે નિર્ણય સમાજ પોતાના નિયમો મુજબ લે છે.

ચકાસણીના બેજ

દરેક ચકાસણી અલગ દેખાય છે: મોબાઇલ નંબર, સમાજ સભ્યપદ, ઓળખનો દસ્તાવેજ, ભણતર, કે સંદર્ભ. હાલ એપમાં, જે પ્રોફાઇલનું સમાજ સભ્યપદ ચકાસાયું હોય તેના પર ટૂંકું "ચકાસાયેલ" લેબલ પણ દેખાય છે; તેનો અર્થ ફક્ત એટલો કે સમાજ સભ્યપદ ચકાસાયું છે, બીજું કંઈ નહીં. મોબાઇલનો બેજ OTP થી આપમેળે મળે છે, સંદર્ભનો બેજ સંદર્ભ આપનાર વ્યક્તિ પુષ્ટિ કરે ત્યારે, અને બાકીના બેજ સમાજ કાર્યાલયના ચકાસણી માટે નીમેલા લોકો દસ્તાવેજ તપાસીને આપે છે. બેજ ફક્ત એ તપાસથી જ મળે છે; કોઈ પ્લાનથી મળતો નથી.

સમાજમિલન વાપરતી વખતે તમે આમાંનું કંઈ નહીં કરો:

• બીજાના નામે, બીજાના ફોટાથી કે ખોટી વિગતથી પ્રોફાઇલ બનાવવી, કે લગ્ન થઈ ગયા પછી પણ પ્રોફાઇલ ચાલુ રાખવી.
• કોઈ પણ કારણે પૈસા, ભેટ કે મદદ માગવી, કે દહેજ માગવું કે આપવું. દહેજ ભારતના કાયદા મુજબ ગુનો છે.
• કોઈને હેરાન કરવા, ધમકાવવા, "ના" પછી પણ વારંવાર સંદેશ મોકલવા, કે અશ્લીલ કે અપમાનજનક સંદેશ મોકલવા.
• કોઈના સમાજ, જ્ઞાતિ, ધર્મ, રંગ, દેખાવ કે અપંગતા વિશે અપમાન કરવું કે નફરત ફેલાવવી.
• કોઈનો નંબર, ફોટો કે બાયોડેટા તેમની મંજૂરી વગર બીજાને મોકલવો, WhatsApp ગ્રુપ કે સોશિયલ મીડિયા પર મૂકવો, કે તેના સ્ક્રીનશોટ ફેલાવવા.
• ડેટિંગ, ધંધો, વેચાણ, જાહેરાત, કે નંબર અને વિગત ભેગી કરવા માટે સમાજમિલન વાપરવું.
• પ્રોફાઇલની વિગત આપમેળે ઉતારી લેવી (scraping), બીજાના ખાતામાં ઘૂસવાનો પ્રયત્ન કરવો, કે એપ અને સર્વરની સલામતી સાથે છેડછાડ કરવી.
• બાળકનું કોઈ પણ જાતીય શોષણ, આવી સામગ્રી, કે આવા ઇરાદાથી બાળકનો સંપર્ક. આવું ખાતું તરત બંધ થાય છે, અને કાયદા મુજબ પોલીસને જાણ કરાય છે.
• ભારતના કોઈ પણ કાયદાનો ભંગ થાય એવું કંઈ પણ.

રોજના વર્તન વિશે વધુ વિગત સમુદાય માર્ગદર્શિકામાં છે. સમુદાય માર્ગદર્શિકા વાંચો

• પ્રોફાઇલ પર, શેર લિંક પર કે કોઈ સૂચનામાં નંબર ક્યારેય હોતો નથી.
• રસ કે પરિચય વિનંતી સ્વીકારાય અને જોડાણ બને, પછી દરેક બાજુ પોતે "મારો નંબર શેર કરો" દબાવે ત્યારે જ પોતાનો નંબર બતાવે છે.
• દરેક શેર અને રદની નોંધ રહે છે. "સંપર્ક રદ કરો" દબાવતાં નંબર સામેની સ્ક્રીન પરથી તરત હટી જાય છે.
• તમને જે નંબર મળે, તે ફક્ત તમારા પરિવારના લગ્નના નિર્ણય માટે છે. તેને આગળ ન મોકલો.
• દુરુપયોગ રોકવા રોજની મર્યાદા છે: ૨૪ કલાકમાં વધુમાં વધુ ૩૦ વખત નંબર શેર, અને ૨૪ કલાકમાં કેટલા રસ મોકલી શકાય તેની પણ મર્યાદા છે.

• કોઈ પણ પ્રોફાઇલ પર "ફરિયાદ કરો" દબાવી કારણ પસંદ કરો: ખોટી પ્રોફાઇલ, ખોટી માહિતી, અયોગ્ય ફોટો, હેરાનગતિ, છેતરપિંડી, પહેલેથી પરિણીત, સમાજની ખોટી વિગત, કે બીજું કંઈ.
• કોણે ફરિયાદ કરી, તે સામેના પરિવારને જણાવાતું નથી.
• "બ્લોક કરો" તરત લાગુ પડે છે, અને બન્ને બાજુ: એકબીજાની શોધ, રસ અને ચેટ બંધ થાય છે.
• સમાજ કાર્યાલય ફરિયાદ તપાસીને તેને રદ કરી શકે, ચેતવણી આપી શકે, પ્રોફાઇલ સસ્પેન્ડ કરી શકે, કે લગ્ન થઈ ગયાં હોય તો પ્રોફાઇલ બંધ કરી શકે. શું થયું તે સભ્યને એપમાં જણાવાય છે.
• આ શરતો કે કાયદાનો ગંભીર ભંગ થાય, તો અમે પણ કોઈ પણ ખાતું સસ્પેન્ડ કે બંધ કરી શકીએ.

અપીલ

પ્રોફાઇલ નામંજૂર થાય, સસ્પેન્ડ થાય કે બંધ થાય, અને તમે સહમત ન હો, તો પહેલાં તમારા સમાજ કાર્યાલય સાથે વાત કરો; સસ્પેન્ડ થયેલી પ્રોફાઇલ તેઓ ફરી ચાલુ કરી શકે છે. ત્યાં ઉકેલ ન આવે, તો ફરિયાદ અધિકારીને લખો. તેઓ આખી વાત ફરીથી જોશે અને તમને જવાબ આપશે. ફરિયાદ અધિકારીનું પાનું

• સમાજમિલનમાં જુદા જુદા પ્લાન છે. આજે કોઈ પણ પ્લાન ફક્ત તમારું સમાજ કાર્યાલય જ ચાલુ કરી શકે છે.
• એપમાં આજે ચુકવણીની કોઈ વ્યવસ્થા નથી.
• દરેક પ્લાન, તેની કિંમત અને તેની શરતો એપ બધા માટે ખૂલે તે પહેલાં આ શરતોમાં સ્પષ્ટ લખાશે.
• ચકાસણીના બેજ કોઈ પ્લાનથી મળતા નથી; તે ફક્ત તપાસથી જ મળે છે.

તમે મૂકેલા ફોટા, લખાણ અને દસ્તાવેજ તમારાં જ રહે છે. તેને સાચવવા, તપાસવા અને ગોપનીયતા નીતિ મુજબ બતાવવા માટે, તમે ZeniaPex ને મર્યાદિત છૂટ આપો છો. આ છૂટ ફક્ત સેવા ચલાવવા પૂરતી છે, અને ખાતું કાઢી નાખતાં પૂરી થાય છે, સિવાય કે ગોપનીયતા નીતિમાં લખ્યા મુજબ કોઈ નોંધ રાખવી પડે.

તમે જે ફોટો કે લખાણ મૂકો, તે મૂકવાનો તમને હક હોવો જોઈએ.

સમાજમિલન નામ, મિલન બિંદુની નિશાની, એપ, આ વેબસાઇટ અને તેની ડિઝાઇન ZeniaPex Private Limited ની માલિકીની છે. અમારી લેખિત મંજૂરી વગર તેની નકલ, ફેરફાર કે વેચાણ ન કરો.

સમાજ કાર્યાલયે મૂકેલી માહિતી, જેમ કે ગોળ-પરગણાની વિગત અને તેના નિયમો, એ સમાજની છે.

• પ્રોફાઇલની વિગત પરિવારો પોતે લખે છે. દરેક પ્રોફાઇલ પર દેખાતી અલગ અલગ તપાસ સિવાય, અમે કોઈ વિગતની ખાતરી આપતા નથી.
• ચકાસણીનો બેજ ફક્ત એટલું જ બતાવે છે જેટલું તપાસનારા એ સમયે ખાતરી કરી શક્યા. તે કોઈની ઓળખ, સ્વભાવ, વર્તન, તબિયત કે આવકની ખાતરી નથી.
• વાત આગળ વધારતાં પહેલાં પરિવાર પોતે પણ તપાસ કરે: ઓળખીતા અને સગાં પાસે પૂછપરછ કરે, અને પહેલી મુલાકાત પરિવારની હાજરીમાં, જાહેર જગ્યાએ રાખે.
• એપ જે પાત્ર સૂચવે છે, તે પસંદગીઓ પર આધારિત માર્ગદર્શન છે, ભલામણ કે ખાતરી નહીં.
• અમે સેવા સતત ચાલુ રાખવાનો પ્રયત્ન કરીએ છીએ, પણ જાળવણી કે ખામીને કારણે ક્યારેક તે અટકી શકે. સેવા "જેવી છે તેવી" આપવામાં આવે છે.

કાયદો છૂટ આપે તે મહત્તમ હદ સુધી, ZeniaPex Private Limited, તેના ડિરેક્ટરો અને કર્મચારીઓ નીચેની બાબતો માટે જવાબદાર નથી:

• સભ્યો વચ્ચેની વાતચીત, મુલાકાત, સગપણ, સગાઈ કે લગ્ન, કે તેનું પરિણામ.
• કોઈ સભ્યે આપેલી ખોટી માહિતી, છેતરપિંડી કે ખરાબ વર્તનથી થયેલું નુકસાન.
• સમાજ કાર્યાલયે લીધેલા મંજૂરી, નામંજૂરી કે ચકાસણીના નિર્ણય.
• સેવા અટકવાથી કે સૂચના મોડી પહોંચવાથી થતું આડકતરું નુકસાન.

કાયદા મુજબ જે જવાબદારી મર્યાદિત ન કરી શકાય, તેને આ મર્યાદા લાગુ પડતી નથી, જેમ કે અમારી પોતાની બેદરકારીથી તમારી માહિતીનો ભંગ થાય ત્યારની અમારી કાનૂની ફરજ.

• એપમાં "પ્રોફાઇલ" ટૅબમાં ગોપનીયતા કેન્દ્ર ખોલી "ખાતું કાઢી નાખો" દબાવો. એપ વગર વિનંતી કરવાની રીત એપ બધા માટે ખૂલે તે પહેલાં ખાતું કાઢવાના પાના પર મુકાશે.
• વિનંતી કરતાં જ પ્રોફાઇલ છુપાઈ જાય છે, અને ૧૪ દિવસ પછી અંગત વિગત ગોપનીયતા નીતિ મુજબ કાયમ માટે કાઢી નખાય છે. ખાતું પાછું ચાલુ થઈ શકતું નથી.
• નિયમ ભંગ થાય, તો અમે કે સમાજ કાર્યાલય ખાતું સસ્પેન્ડ કે બંધ કરી શકીએ.
• ખાતું બંધ થયા પછી પણ, જવાબદારીની મર્યાદા, કાયદો અને અદાલત, અને રાખવી પડતી નોંધ વિશેની શરતો લાગુ રહે છે.

• ખાતું કાઢવાની પૂરી વિગત
• માહિતી કેટલો સમય રહે છે

આ શરતો ભારતના કાયદાને આધીન છે. આ શરતો કે સેવા વિશેના કોઈ પણ વિવાદમાં, ફક્ત અમદાવાદ, ગુજરાતની અદાલતોને અધિકારક્ષેત્ર રહેશે.

અદાલતમાં જતાં પહેલાં, કૃપા કરીને ફરિયાદ અધિકારીને લખો. મોટા ભાગની વાત વાતચીતથી જ ઉકેલાય છે.

આ શરતોમાંની કોઈ વાત, કાયદાથી તમને મળતા હક, જેમ કે ડેટા સંરક્ષણ કાયદા હેઠળના હક, છીનવી લેતી નથી.

આ પાનાની ઉપર શરતોની આવૃત્તિ લખેલી છે. ફેરફાર લાગુ થયા પછી પણ તમે સમાજમિલન વાપરતા રહો, તો તમે નવી શરતો સ્વીકારો છો. મંજૂર ન હોય, તો તમે ખાતું કાઢી શકો.

આ શરતોનો કોઈ ભાગ અમાન્ય ઠરે, તો પણ બાકીની શરતો લાગુ રહે છે.